“Tri pikët dhe performanca e djemve që u përpoqën të fitonin kundër Fiorentinës, ndaj të cilës është e vështirë të luash, më bëjnë të kënaqur. Ne vuajtëm më shumë në pjesën e parë, ndërsa në pjesën e dytë Szczesny nuk bëri asnjë pritje. Në pjesën e parë patëm 2-3 mundësi në fushë të hapur, ku mungoi pasimi i fundit”.
Massimiliano Allegri e nisi kështu deklaratën për Dazn, pas fitores minimale në fushën e Fiorentinës. Më tej, trajneri bardhezi vazhdoi: “Ne duhet të shohim gjithmonë përpara, por kjo nuk duhet të keqkuptohet. Nuk duhet të flasim për objektivin e titullit. Interi, Milani dhe Napoli janë më përpara se ne.
Kemi shumë të rinj. Kemi luajtur një ndeshje teknike kundër Veronës, sot ishte një ndeshje ndryshe. Ndeshjet fitohen edhe me vuajtje, edhe me një fazë të shkëlqyer mbrojtëse. Në pjesën e dytë, nëse Kostic zbriste në vijën e Ruganit, nuk mund ta hapte lojën.
Kishim pak vështirësi në driblimin. Duhet të përmirësohemi kur qëndrojmë dy kundër dy në sulm. Më duhet ta përgëzoj Fiorentinën, sepse luajti një ndeshje të shkëlqyer. Në pjesën e dytë, kur patëm më shumë mundësi për ta mbajtur topin, mund ta menaxhonim më mirë lojën. Ne mbrohemi shumë mirë në zonë.
Kean luajti një ndeshje të mirë, më pas na duheshin Vlahovic dhe Milik. Zëvendësimet na ndihmuan, sepse ulëm ritmin dhe Fiorentina humbi qartësinë. Jam i kënaqur me golin e Mirettit. Herë pas here kritikohet për paraqitjet e tij, por ka cilësi të rëndësishme.
Sa i përket mentalitetit, tashmë është rritur shumë. Kur Rugani kishte Barzaglin, Chiellinin dhe Bonuccin para tij, luftoi për të gjetur hapësira, por gjithmonë bënte mirë. Tani është më i mirë në pozicionim, një cilësi në të cilën Gatti ende duhet të përmirësohet.
Interi? Së pari kemi Cagliarin për t’u përballur. Kampionati është shumë i gjatë, e dimë se kemi limite dhe po punojmë për to. Megjithatë, kemi edhe cilësi të rëndësishme. Interi është një ekip i ndërtuar për të fituar titullin, por edhe ne meritojmë respekt. Tani kemi punë me Cagliarin, që Ranieri e ka rikthyer në këmbë. Pastaj është pushimi prej kombëtareve dhe më pas do të përballemi me Interin”.
