Sot u zhvillua hapja solemne e organizatës “Horizonte të Ndritshme”, për edukimin e të rinjve si ndërtues të së ardhmes

Me pjesëmarrjen e personaliteteve të shquara në fushën e arsimit, u zhvillua sot hapja solemne e organizatës joqeveritare “Horizonte të Ndritshme”. Ngjarja u mbajt në qendrën kulturore Yunus Emre dhe u karakterizua nga një seri fjalimesh inspiruese dhe diskutimesh të frytshme.

Kryetari Hamzi Ibraimi hapi ngjarjen me një fjalim përshëndetës, duke theksuar rëndësinë e edukimit si një shtyllë kryesore për zhvillimin e shoqërisë. Paneli i diskutimit, i moderuar nga Amela Klimenta, trajtoi temën “Edukimi për qëndrueshmëri, të rinjtë si ndërtues të së ardhmes”, duke sjellë në vëmendje nevojën për një qasje më të përfshirëse dhe të qëndrueshme në edukim.

Ministri i Arsimit dhe i Shkencës, Jeton Shaqiri, foli për sfidat dhe arritjet e sistemit arsimor në vend, ndërsa znj. Fatime Ziberi, psikologe në Universitetin Ndërkombëtar Ballkanik, ndau perspektivën e saj mbi aspektin social të edukimit dhe rëndësinë e socializimit të studentëve.

Naser Miftari, profesor në gjimnazin Zef Lush Marku, solli në diskutim temën e digjitalizimit në edukim dhe sfidat që teknologjia i sjell mësimdhënies. Pjesëmarrësit u nxitën të reflektojnë mbi rolin e tyre si ndërtues të së ardhmes në një botë që ndryshon me shpejtësi.