Lideri i Bashkimit Demokratik për Integrim Ali Ahmeti, ka njoftuar sot bashkangjitjen e Partisë Demokratike Turke në koalicionin e Frontit Europian. Ceremonia e nënshkrimit të marrëveshjes u zhvillua në Pallatin e Kulturës në Gostivar, ku qytetarët e mbledhur dëshmuan një moment historik për vendin.
Ahmeti dhe Bejxhan Iljas, kryetari i TDP-së, kanë nënshkruar një marrëveshje që simbolizon unitetin dhe angazhimin e përbashkët për një të ardhme më të sigurt dhe më progresive për fëmijët e vendit. Ky hap i ri shënon një përkushtim të fortë për të realizuar misionin e integrimit në Bashkimin Europian dhe për të ndërtuar një të ardhme ku të gjithë qytetarët mund të përfitojnë nga vlerat dhe mundësitë që ofron Europa.
Në fjalimin e tij, Ahmeti theksoi rëndësinë e vazhdimit të mobilizimit drejt horizontit të Europës dhe të qëndrimit të fortë në mbështetje të vlerave europiane, duke thënë “Jo Rusisë, PO Europës!” Ky mesazh reflekton angazhimin e vendit për të qenë pjesë e një komuniteti më të madh që promovon paqen, stabilitetin dhe bashkëpunimin.
Statusi i plotë:
Frontit Europian sot iu bashkangjit edhe Partia Demokratike Turke (TDP) në vendin tonë, e kryesuar nga Dr. Bejxhan Iljas me të cilin në sallën e mbushur plotë me qytetarë në Pallatin e Kulturës në Gostivar nënshkruam marrëveshjen historike të koalicionimit.
Po bëhemi bashkë për të ardhme më të sigurt dhe më progresive të fëmijëve tanë, për të realizuar misionin e përbashkët të integrimit në Bashkimin Europian.
Vazhdojmë mobilizimin drejt horizontit të Europës!
T’i themi Jo Rusisë, PO Europës!
