17/07/2024

Kryetari i opozitares VMRO DPMNE, Hristijan Mickoski po diskrediton grupin punues për hartimin amendamenteve kushtetutese për përfshirjen e bullgarëve dhe komuniteteve të tjera më të vogla në preambulë. Nga ministria e Drejtësisë nuk komentojnë qëndrimet e Mickoskit pas shpalljes së përbërjes së trupit punues, ndërsa shumica shpreson që në hartimin e ndryshimeve kushtetuese të përfshihen edhe partitë opozitare, shkruan Indeks.mk

Mickoski nuk pret asgjë nga grupi punues të cilin e ka konsideruar si trungun familjar të LSDM-së dhe BDI-së.

“A janë ekspertë?” Nuk kam çfarë të shtoj për trungjet familjare në BDI dhe në LSDM. Më vjen turp për turpin e tyre. Unë nuk pres asgjë nga grupi i punës, pres përgjegjësi dhe kur të përcaktohet nevoja për hapjen e Kushtetutës në parlament, nuk do të ketë sukses. Do të jetë një tjetër politikë e dështuar e Kovaçevskit dhe pastaj do të pasojë përgjegjësi penale për ata që do të marrin honorare nga populli, dhe nuk do të bëjnë asgjë, sepse puna e tyre është e pakuptimtë”, tha Mickoski.

Në anën tjetër, ministria e Drejtësisë bëri të ditur se grupi punues do të plotësohet me anëtarë të tjerë të cilët do të kontribuojnë në përgatitjen e ndryshimeve kushtetuese. Ata duhet të përgatisin propozim-iniciativën për nevojën e ndryshimeve kushtetuese. Pas përgatitjes së amendamenteve, propozimi do të kalojë nëpër të gjitha trupat punuese brenda Parlamentit dhe paralelisht do të mbahen dëgjime publike ekspertësh ku ekspertë, parti, organizata të shoqërisë civile dhe institucione të tjera do të mund të shprehin qëndrimet e tyre.

Profesor Jeton Shasivari vlerëson se ky proces i hapjes së Kushtetutës, krahasuar me angazhimet e mëparshme, siç është Marrëveshja e Prespës, ka karakter më gjithëpërfshirës, më të hapur dhe demokratik.

“Besoj se palët që aktualisht nuk janë pjesëmarrëse në grupin e punës do të përfshihen në fazën e mëvonshme të dëgjimeve publike dhe do të japin kontributin e tyre. Grupi i punës nuk duhet të ngarkohet me pyetjen nëse Parlamenti do të ketë një shumicë prej dy të tretash për të përcaktuar nevojën për hapjen e Kushtetutës. Në vitin 2014, kur kishte dy të tretat në parlament për hapjen e Kushtetutës, u përgatitën edhe draft amendamentet, por nuk u votuan asnjëherë amendamentet kushtetuese të propozuara nga qeveria e atëhershme e VMRO-DPMNE-së”, deklaroi për “Slloboden peçat” – profesor Shasivari, përcjell Indeks.mk